Archives départementales de la Côte-d'Or. G 4098. Clergé séculier. Paroisses, chapelles et confréries. Cure et fabrique de Rouvres-en-Plaine. Extraits de la transcription publiée dans : David, Henri. Quelques artistes méridionaux en Bourgogne. In : Annales du Midi : revue archéologique, historique et philologique de la France méridionale, tome 47, n°188, 1935. p. 329-364. p. 342-343.

En nom de Nostre-Seigneur, amen. L'an de l'Incarnacion d'icellui courant mil quatre cens quarente et huit, le dix-neufiesme jour du mois de may, Je Pierre Floix, prebstre, curé de Rouvre, du diocèse de Chalon, savoir faiz à tous présens et advenir qui verront ou ourront ces présentes lettres, comme honnorable homme Phelippe Mâchefoin, conseillier, premier varlet de chambre et garde des joyaulx de monseigneur le duc de Bourgoigne, cappitain et son chastellain dudit Rouvre, mehu de bonne dévocion et charité et affin que moy et mes successeurs, curés dudit Rouvre soions tenus de prier Dieu, la très glorieuse Vierge Marie, sa mère, monseigneur saint Jehan Baptiste, monseigneur saint Jean l'Euvangéliste et tous les autres glorieux sains et saintes de la très haulte cour célestial de paradis, pour le remède et salut des âmes de luy, Symonnote de Tard, sa femme, et pour feurent ses très chiers père et mère, Monnot Mâchefoin et Jehannote de Courcelles, sa femme, Monnot Rosier et Colin Mâchefoin, ses grans pères, ses frères et suers et autres ses parens et amyz charnelx cui Dieu pardoint, pour lesquelx il est tenu de prier ; et affin aussi que luy et ladicte Symonnote, sa femme, soient participans et accompaigniez en tous les biens faiz et oroisons qui doresnavant ce feront et diront en laditte église de Rouvre, icellui Phelippe m'ait aujourduy donné et octroyé perpétuellement pour moy et mesdiz successeurs curés dudit Rouvre ou temps advenir, en augmentacion de ladicte cure et aussi en augmentacion et entretenement de la confrarie dudit monsieur Saint Jehan Baptiste instituée et ordonnée en ladicte église de Rouvre, de laquelle confrarie ledit Phelippe et sa dicte femme sont confrères et conseurs, les rentes, censes, revenues et héritaiges qui s'ensuivent [...]. Et ladicte donnacion, augmentacion et octroy ledit Phelippe Mâchefoin ait fait à moy ledit curé de Rouvre pour et parmy ce que je ledit curé suis et seray tenus pour moy et mesditz successeurs [...] de dire et célébrer, ou faire dire et célébrer en ladicte église perrochial dudit Rouvre à l'autel de la chapelle Nostre-Dame qu'il a fait faire de nouvel, quatre basses messes chacune sepmaine de l'an à tousjours mais perpétuellement.

Archives départementales de la Côte-d'Or. B II 360/3. Cours et juridictions. Justices communales. Justice criminelle, Ville de Dijon (1442-1448). Extraits de la transcription publiée dans : [Exposition. Dijon, Musée des Beaux-Arts. 1972]. Jean de La Huerta et la sculpture bourguignonne. Dir. Pierre Quarré. Dijon : Musée de Dijon, Palais des Ducs de Bourgogne, 1972, p. 33-35.

Information faite par moy Thiébault Liégeard substitut de honnorable homme Jehan Rabustel, procureur général de la ville et commune de Dijon, et en son absence. Aujourdhuy Xe du moys de décembre l'an mil CCCCXLVIII de et sur ce que l'en dit que le lundi précédent, le IXe jour dudit mois devant l'ostel Arnolet de Buis près la posterne de l'ostel de Crux ung nommé Jehan de Drogues, ymaigeur, demourant audit Dijon a vouslu frapper de une daigue honorable homme et saige sire Philippe Machefoing maïeur de ladite ville et dament par la gorge et juré par la mort Dieu par plusieurs fois et dit audit maire qu'il estoit mieulx officier de Monseigneur le duc que luy. Et jasoit ce que ledit maieur avoit ses deux sergens devant luy et aussi tutoyé ledit Monseigneur le maire par plusieurs foys. Sur le quel cas je me suis informé par les tesmoings qui s'ensuivent. Les quels ont dépposé par leurs sermens pour ce donnez aux sains euvangiles de Dieu Notre Seigneur savoir dudit cas ce qui s'ensuit.

Premièrement. Honnorable homme Colin Lomme bourgeois et eschevin dudit Dijon aaigié de XL ans comme il dit, dit savoir du cas ce qui sensuit. C'est assavoir que lundi derrier passé environ l'eure de IX heures avant midi il venoit devers la chapelle et vit et ouy que ledit monseigneur le maieur et Jehan de Drogues avoient débat ensemble et pour ce se avanca et mit entre deus, et luy estant vers eulx, vit ledit monseigneur le maire qui dit audit de Drogues : Jehannin, faictes moy mon ouvraige, car vous avés jà eu XII frans de moy et si n'ovrés point pour moy et si me devés une queue widange. Lequel Jehannin lui respondit : Par la mort dieu, il n'en est riens et n'ovreray ja pour vous, se vous ne me faictes le paiement de XXIIII frans dont desja j'ai receu de vous XII frans seullement. Lequel monseigneur le maire respondi doulcement audit de Drogue : Vous savés bien que mon marchié est tel que je ne vous doy rien baillier oustre lesdis XII frans jusques à ce que mon ovraige soit fait. Lesquel Jehannin incontinent très despiteusement dit audit Maieur : Par la mort Dieu, il n'en est riens et lors ledit Maïeur lui respondit qu'il mentoit en soy approchant de luy et incontinant ledit de Drogues de courage mal meu tira sa daigue quatre dois dehors la gaingne disant que se ledit Maieur le frappoit qu'il le refrapperoit et qu'il estoit aussi bien mieulx à Monseigneur que estoit ledit maïeur. Et plus du cas n'en scet sur ce souffisamment requis. [...].